Ano nga ba ang wikang Filipino? Ito ba'y Tagalog o ito ba'y higit pa sa Katagalugan at sa rehiyonalismo ng bansa? Habang palapit na nating ipagdiwang ang Buwan ng Wikang Pambansa. Hayaan mo akong mag-apil o samahan ka sa paglalakbay upang maunawaan kung ano nga ba talaga ang wikang Filipino. Ako'y hindi dalubhasa sa usapin kaya't malaya mo akong mababatikos ngunit nananatili ang aking mensahe. Ang wikang Filipino ay hindi Tagalog bagama't sa Tagalog ito nakabase. Ang wikang Filipino ay konglomerisasyon o pagsasamasama ng tanang mga wika sa mga Isla ng Filipinas. Ang wikang Filipino ay isang "work in progress". Maaring masabing wala pa talagang Filipino sapagkat di pa nabubuo ang wikang ang tanan sa mga Isla'y makakasabot. Sa kabilang banda nama'y mahusay ang pag-gabay ng Tagalog sa Filipino sapagkat nagsisilbi itong lingkuranan o luklukan sa Filipino. Ang bawat bahagi ng bansa'y nakakaunawa rito. Ngunit ang natatanging problema'y rehiyonalismo. Nananatili pa rin ang pagkakawatakwatak ng bayan dahil sa rehiyonalismo. Nanatiling iniisip ng mga Tagalog na ang mga Cebuano'y di sila tatanggapin. Gayon din naman ang maling pananaw ng isa pa. Ang mga Kapampangan ay nanatiling "mga mayayabang at mga datu" ayon sa iba. Ang mga Ilonggo'y nanatiling di maunawaan sapagkat di malaman kung galit o hindi. "Kuripot at barat" pa rin ang turing sa mga Ilocano. Tinitingnan pa rin ang Kamindanaoan bilang lupain ng digmaan bagama't di na ito ganoon katotoo. Ito ang iba't ibang mga kathang isip na pinaniniwalaan natin laban sa kapwa Pilipino. Bakit nagkagayon? Ito ay bunga ng pananakop ng mga dayuhan sa bansa. Ang mga Kastila'y nakaisip ng magayong ideya: panatilihin ang pagkawatakwatak ng mga isla upang kung may pag-aalsa sa isang rehiyo'y ang kabila ang tutugon. Divide et Impera. Ito nama'y labis pang pinagyaman ng mga Amerikano. Ang mga Hapones naman na nagsikap na ipabatid sa atin ang kahalagahan ng nasyonalismo higit sa rehiyonalismo'y nagkataong kalaban noong panahong iyon kaya't walang nakinig. Ito ang nais sugpuin ng pagdedeklara ng Pambansang Wika. Bagama't maraming kritiko ang nagsabing isa itong kabalintunaan ng Pangulong Quezon sapagkat siya mismo'y Tagalog, ang pambansang wika'y isa pa ring proyektong di pa natatapos (maaring ito'y hanggang sa kahangturan). Palagi itong lalago at magbabago ng mukha sapagkat ang panaho'y nagbabago rin ngunit mananatiling ang Filipino ang gagabay at magiistruktura sa pagkatao ng Pilipino. Ang rehiyonalismo ang nagpabagsak sa bansa maraming ulit na. Pagkakaisa ang nagdulot kay Aguinaldo upang umabot sa pwertahan ng Intramuros at rehiyonalismo naman ang nagpabagsak sa unang republika. Rehiyonalismo ang nagluklok sa isang diktador at pagkakaisa ng bansa naman ang nagpabagsak sa kanya. Rehiyonalismo muli ang nagtutulak na ilibing siya sa hantungan ng mga bayani ng bayan at rehiyonalismo rin ang naghahati sa bansa ukol sa isyung ito. Isa lamang naman ang solusyon sa problemang ito. Pagkakaisa. Ang Pagtuklas ng pagkakaparehas ng ating mga tribo: ang ating pagiging tao - ang ating pagiging Pilipino. Ang simula nito'y ang pagpapayaman sa sariling wika. Kailangan nating iabi-abi ang nasusulat sa Saligang Batas: pagyamanin ang wikang Filipino gamit ang iba't ibang wika at dayalekto ng mga rehiyon. Paglimiang maigi katumbas nito ang ating maratabat. Konglomerisasyon
Conglomeration sa Ingles. Sa Filipino ay Pagsasama-sama Makasabot
Maunawaan Magayon
e.g. "magayong ideya". Bicolano para sa maganda. lingkuranan
Bisaya para sa upuan Abi-abi
Kinaray-a para sa i-welcome Paglimian
Pag-isipan. maratabat
Nangangahulugang mataas na uri ng dignidad |
anonymous lenzJust a traveling someone in this reality we have fallen in love with... this we call our world... "What is essential is invisible to the eyes..." Tags
All
"The absolutely other is the Other" Archives
September 2018
"There is only one corner in the universe that you can be certain of improving and that's your own Self" |